Drucken

Philosophie

Definitiv ond endgültig kei Metzgermusig, aber met de Tier heds of sech:
Mer send e zwäge, rüüdige Sauhuufe, wo e gueti Kameradschaft bi zwöi, drüü, acht... Bierli au onderem Johr düend pflege.
Vel Wärt legged mer of üsi ufwändige ond spezielle Fasnachts-Sujets, womer met üsem Kafi/Sujet-Wage ned nor optisch düend abronde (do chasch Dech of em Chappelplatz bimene Käfali sälber öberzüge). Natürlech gämmer gärn tierisch Gas, am Beschte bimene heisse, fägige Platzkonzärt met üsem Chottle-Power-Sound. Heubörzu vo üsne Paukischte inklusive.

Chottle-Gschecht
D'Chottlebotzer send en Abspletterig vo de Schöttsteifäger. Es esch 1982 zor Trennig cho, well e grosse Teil vo de Schöttsteifäger nömme het welle am Lozärner Fasnachtsomzoog metmache.
Eigentlech hend mer de Name Schöttsteifäger welle öbernäh. Do de ander Teil aber grösser gsi esch, send mer bi de Abstemmig onderläge. Also hend mer (Roland Mosimann, Hanspeter Bütler, Urs Doggwiler; Urs Styger; Urs Mutter ond Hermann Suter) e neui Guuggemusig grönded.
A de effektive Gröndigsversammlig (wos drom gange esch dem Chend a Name z'geh) esch es de spannend worde.
Mi Papi, Hermann Suter-Dormann, (dozmol LFK-Präsident) het d'Idee ka i de Guuggemusig de Name "Chottlebotzer" z'gä. Womet de Norbi Rutz allerdengs öberhaupt ned iiverschtande gsi esch. Er hät nämlich uf de Name "Näbuhörner" plädiert.
Do zo jener Zyt d'Martha Doggwiler (d'Muetter vom Urs "Hacki" Doggwiler) em St. Anna-Spital gwilet hät, hen mer bschlosse d'Entscheidig i de Patiente ond Bsuecher em Zemmer vo de Martha Doggwiler z'öberlo.
S'Resultat esch eindütig gsi: 16:3 för d'Chottlebotzer. De Norbi Rutz het allerdengs ned locker glo und het uf sine Näbuhörner beharrt. Also hend mer bschlosse es letschts Schiedsgrecht izschalte ond hend am Sonntig-Nommitag - s'esch de 7. November 1982 gsi - em 111 aglüte.
"Uskonft, Sie wönschid?
Welle Name wördid Sie geh, hemer gfrogt. S'Fräulein bi de Uskonft het chorz entschlosse en Omfrog i de Telefonzentrale gmacht. S'Resultat esch nömme e so eidüdig gsi. Aber wenn ech mech rächt erennere,händ d'Chottlebotzer met 2 Stemme Abstand gwonne. Als Trost för de Norbi nenne mer set jehär üsi Neumetgleder während em Probejohr "Näbuhörner"
Dementi:
Emmer weder send mer als Metzgermusig betetelt worde, was mer vehement dementieret. Obwohl 2 Gröndigsmetgleder glernti Metzger send, het de Name ned wörklech met dem Bruef z'tue.
Es esch folgendes: Es get em Lozärndütsch tatsächlech de Usdrock:
Chottle botze
Was nüd anderes bedütet, als öpperem d'Meinig z'säge, respektiv d'Levite z'lese (was zor Lozärner Fastnacht passt).
De Chottle-Gebortstag am 7. November 1982 fiire mer öbrigens no höt met em traditionelle "Chottle-Frass".
Hermann Suter jun.
Gründungsmitglied und Ehrenpräsident der Chottlebotzer Lozärn

Nächste Events